इटहरी । राजस्व घटाउनका लागि इटहरीका नगर सभा सदस्यहरुले विशेष अधिवेशन माग गरेका छन् ।
नेकपा एमालेबाट निर्वाचित संसदीय दलका सदस्यहरुले नियमअनुसार २१ दिनभित्र विशेष अधिवेशनको माग गर्दै निवेदन दिएका हुन् ।
नेपाल संविधानको धारा २२७ तथा गाउँ नगर सभा सञ्चालन कार्यविधि ऐन २०७५ को दफा ३ को उपदफा ४ बमोजिम उनीहरुले विशेष अधिवेशन बोलाउन माग गरेका हुन् । एमाले संसदीय दलको उपनेता प्रमोद शेर्पा तथा सचिव उमेश सुवेदीले प्रमुख प्रशासकीय अधिकृत रामचरित मेहतालाई सदस्यहरुको हस्ताक्षरसहितको पत्र दिएका छन् ।
इटहरी उपमहानगरपालिकाले चालु आर्थिक वर्षको बजेटमार्फत् बढाएको कर समायोजन गर्न तथा घटाउनको लागि एमालेबाट निर्वाचित जनप्रतिनिधिहरुले पटक पटक माग गर्दै आएका छन् । त्यसो त केही समयअघि उपमेयरको अध्यक्षतामा बैठक बस्ने चेतावनीसमेत दिएका थिए । तर उपमहानगरपालिकाका मेयर हेमकर्ण पौडेल भने कर नघटाउने अडानमा छन् ।
कर समायोजनका लागि अध्ययन गर्न भन्दै केही समयअघि समितिसमेत बनेको थियो । कर घटाउनुपर्ने सुझावससहित समितिले प्रतिवेदन दिएको बताइएको छ । सोही प्रतिवेदनको सम्बन्धमा यसअघिको कार्यपालिका बैठकमा छलफल हुने कार्यसुचीमा भएपनि छलफल नहुँदै बैठक भाँडिएको थियो ।
इटहरी उपमहानगरपालिकाले चार सय प्रतिशतसम्म सम्पत्ती कर बढाएपछि नेपाली काँग्रेसबाहेकका राजनीतिक दल, नागरिक समाज तथा व्यवशायीहरुले कर घटाउन माग गर्दै आएका छन् ।
