इटहरी । इटहरीमा डुबेर दुई जना बालकको निधन भएको छ ।
आइतबार इटहरी–२ स्थित माया घर छेउ, सुकल्प भवन नजिकै रहेको खोलाको दहमा डुबेर दुई जना बालकको निधन भएको हो ।
उक्त भवन छेउ नयाँ पुल बनेको छ । सोही पुलमुनि रहेको टेङ्ग्रा खोलामा बालक डुबिरहेको अवस्थामा स्थानीयले भेटेपछि प्रहरीलाई जानकारी गराएका थिए ।
तत्कालै खटिएको प्रहरीसहित स्थानीयले घटनास्थलबाट दुवै बालकलाई उद्धार गरी उपचारका लागि विराट टिचिङ अस्पतालमा पठाइएको थियो ।
तर, उपचारका क्रममा दुवै बालकको मृत्यु भएको प्रहरीले पुष्टि गरेको छ । मृत्यु हुनेमा ११ वर्षीय क्रिवास लिम्बू र इटहरी–३ का ८ वर्षीय दिप्सन चौधरी रहेका छन् ।
संखुवासभाको चैनपुर–१ घर भएका लिम्बू इटहरी–२ स्थित सानिमाको घरमा बसेर अध्यापन गर्दै आएका थिए ।
घटनाबारे थप अनुसन्धान भइरहेको प्रहरीले जनाएको छ ।
