काठमाडौं । गायक योगेश्वर अमात्यको नयाँ म्युजिक भिडियो ‘कुनै दिन’ सार्वजनिक भएको छ ।
अमात्यले आफ्नै अफिसियल युट्युब च्यानलमार्फत भिडियो सार्वजनिक गरेका हुन् ।
करिब १२ वर्षपछि योगेश्वरले यो नयाँ गीत सार्वजनिक गरेका हुन् । सरोज बास्तोलाका शब्दहरूको यो गीतलाई सुरुवातमा विसं २०५१ सालमा यसका सङ्गीतकार ओम विक्रम विष्टले आफ्नै आवाजमा रेकर्ड गरेका थिए ।
तर, विभिन्न कारणले गीतलाई त्यति बेला सार्वजनिक गर्न सकिएको थिएन । हाल गीतलाई पुनः एरेन्ज गरी योगेश्वरले आफ्नो आवाजमा रेकर्ड गरेर भिडियो सहित प्रस्तुत गरेका हुन् ।
‘कुनै दिन’ गीतको म्युजिक भिडियोमा सुव्रत आचार्यको कन्सेप्ट र निर्देशन छ भने क्रिएटिभ निर्देशक जया शर्मा रहेकी छिन् । म्युजिक भिडियोमा कलाकारहरू प्रवीण खतिवडा, करुणा श्रेष्ठ र विकाश लामिछानेले अभिनय गरेका छन् ।
