काठमाडौँ । पाकिस्तानको राजधानी इस्लामाबादस्थित सरकारी अस्पताल ‘पाकिस्तान इन्स्टिच्युट अफ मेडिकल साइन्सेज’ (पिम्स) को बाल वार्डमा आगलागी हुँदा १४ जना नवजात शिशुको मृत्यु भएको छ। अस्पतालका कार्यकारी निर्देशकले शिशुहरूको मृत्यु भएको पुष्टि गरेका छन्।
इस्लामाबाद जिल्ला प्रशासनका अनुसार आगलागी अस्पतालको ‘एमसिएच’ वार्डको तेस्रो तल्लामा भएको हो। घटनाको जानकारी पाउनासाथ उद्धार टोली घटनास्थलमा पुगेको थियो।
सञ्चारमाध्यमहरुका अनुसार आगलागीलाई तुरुन्तै नियन्त्रणमा लिएर बालबालिकाहरूलाई सघन उपचार कक्षमा सारिएको प्रशासनले जनाएको छ। घटनाको अनुसन्धानका लागि अतिरिक्त डेपुटी कमिसनर जनरलको संयोजकत्वमा एक छानबिन समिति गठन गरिएको छ। उक्त समितिले आगलागीको कारणबारे अध्ययन गर्नेछ।
एयर कन्डिसनर युनिटबाट सल्किएको आगो अक्सिजन सिलिन्डररलाइनका कारण तीव्र गतिमा फैलिएको थियो। दुर्घटनाका बेला वार्डमा १५ जना शिशु भर्ना थिए।
