काठमाडौं । फिल्म ‘एक भगवत् गीता’लाई लिएर भइरहेको विवाद साम्य भइसकेको छैन । शीर्षक र चरित्र चित्रणमा आपत्ति जनाउँदै हिन्दु धार्मिक संघसंस्थाले विरोध जनाइरहेका छन् ।
चलचित्र विकास बोर्डले सेन्सर सिफारिस दिइसकेको छैन । भदौ २९ गतेबाट प्रदर्शनको तयारीमा रहेको फिल्मको प्रचारमा जुट्नुपर्ने बेला निर्माता विवाद मिलाउन बोर्ड कुदिरहेका छन् । बोर्डले आइतबार निर्माता र धार्मिक संघसंस्थालाई छलफलमा बोलाएको छ ।
यसैबीच निर्देशक झरना थापाले शनिबार मध्यरातमा फेसबुकमा भावुक स्टाटस लेख्दै फिल्मलाई रोकिएकोप्रति पीडा व्यक्त गरेकी छन् । आफूले जीवनभर राष्ट्रको भौगोलिक अखण्डता, सांस्कृतिक विविधता, धार्मिक आस्था र सहिष्णुतामा आँच आउने कर्म अहिलेसम्म नगरेको पनि उनले बताएकी छन् ।
उनी लेख्छिन्, ‘बारम्बार हामीले हाम्रो चलचित्रको कथावस्तु सुनाएर श्रीमद् भागवतगीताको अवहेलना नभएको प्रमाण बताइरहँदा पनि चलचित्रलाई सेन्सर अनुमति नै दिइएको छैन । आफ्ना सारा स्रोत सम्पत्ति, सपना र अहिलेसम्मको चलचित्रकर्मको लगानी गरेर बनाइएको चलचित्र यसरी चल्नै नदिने अवस्था आउँदा मर्नु न बाँच्नुको पीडा भइरहेको छ ।’
झरना निर्देशित फिल्ममा विपिन कार्की, सुहाना थापा र धीरज मगरको शीर्ष भूमिका छ ।
