काठमाडौं । घरेलु टोली कतार फिफा विश्वकपको समूह चरणबाटै बाहिरिएको छ ।
समूह एमा रहेको कतार लगातार २ खेलमा पराजित भएपछि एक खेल अगावै समूह चरणबाट आउट भएको हो ।
आज कतार सेनेगलसँग ३–१ गोल अन्तरले पराजित भएको हो ।
दोहामा भएको खेलमा सेनेगलले ४१ औं मिनेटमा गोलको खाता खोलेको थियो । उसका लागि बोलेए डियाले गोल गर्दै अग्रता दिलाएका थिए ।
पहिलो हाफमा १ गोल गरेको सेनेगलले दोस्रो हाफमा २ गोल थप्दा १ गोल व्यहोरेको थियो ।
फमारा डेधेयुले दोस्रो हाफको सुरुमै गोल गर्दै सेनेगलको अग्रता दोब्बर बनाए ।
७८ औं मिनेटमा मोहम्मद मुन्टरीले गोल गर्दै अग्रता २–१ मा झारेका थिए । मुन्टरी विश्वकपमा पहिलो गोल गर्ने कतारी खेलाडी पनि बनेका छन् ।
८४ औं मिनेटमा बेम्बा डिङले गोल गरेपछि सेनेगल ३–१ गोल अन्तरले विजयी भयो ।
कतारले अब अन्तिम खेलमा नेदरल्याण्ड्ससँग खेल्ने छ ।
