धरान । धरान –१५ बस्ने ३४ बर्षीया छुङकु मगर (राई) को श्रीमानको कुटपिटबाट मृत्यु भएको छ ।
१ नम्बर प्रदेश प्रहरी कार्यालय विराटनगरले दिएको जानकारी अनुसार कार्तिक १८ गते बेलुका ६ बजेको समयमा छुङकुका श्रीमान् ४१ वर्षीय महेन्द्र राईले कुटपिट गर्दा उनी घाइते भएकी थिइन ।
घाइतेलाई केही दिन घरमै सामान्य उपचार गरी सोमबार(हिजो) थप उपचारको लागी बीपी प्रतिष्ठान लगिएकोमा उपचारको क्रममा मृत्यु भएको हो ।
घटनाको जानकारी पाउनसाथ इलाका प्रहरी कार्यालय धरानबाट खटिएको प्रहरी टोलीले महेन्द्र राईलाई नियन्त्रणमा लिएको इलाका प्रहरी कार्यालय धरानले जनाएको छ ।
हत्या आरोपमा पक्राउ परेका राईको सम्बन्धमा प्रहरीले थप अनुसन्धान गरिरहेको जनाएको छ । मृतकको शव पोस्टमार्टमको तयारी भइरहेको प्रहरीले जनाएको छ ।
