काठमाडौं । १९ वर्षमुनिको एसिया छनोट खेल्न नेपाली महिला क्रिकेट टोली बुधबार मलेसिया जाँदैछ ।
छनोट खेलमा सहभागी हुन जाने १४ खेलाडी, प्रशिक्षक र चारजना अफिसियललाई नेपाल क्रिकेट संघ (क्यान) ले मंगलबार नै कार्यक्रम गरी विदाई गरेको छ ।
छनोट खेल मलेसियाको क्वालालम्पुरमा जेठ २० देखि २६ सम्म हुनेछ ।
एसिया छनोट प्रतियोगिताको विजेता टोलीले विश्वकप खेल्न पाउनेछ । छनोटमा नेपालसँगै भुटान, मलेसिया, कतार, युएई र थाइल्याण्ड छन् ।
नेपालले पहिलो खेल जेठ २० मा कतारसँग खेल्नेछ ।
आईसीसीले पहिलोपल्ट आयोजना गर्न लागेको महिला १९ वर्षमुनिको विश्वकप सन २०२३ जनवरीमा दक्षिण अफ्रिकामा हुँदैछ ।
