जनकपुर । रामायण सर्किटअन्तर्गत सञ्चालन हुने भारतीय रेल आज जनकपुरधाम आउँदै छ । रेलमा भारतीय पर्यटकहरु सवार हुनेछन् । ‘भारत गौरव पर्यटक रेल’ नाम दिइएको रेल आज दिउँसो जनकपुर स्टेसनमा आइपुग्ने छ ।
भारतीय पर्यटकहरुलाई जनकपुर भ्रमण गराउन मधेश प्रदेश सरकारको उद्योग, पर्यटन तथा वन मन्त्रालयले समन्वय गरेको छ । उनीहरुलाई जानकी मन्दिर, धनुषाधाम र जनकपुरमा दैनिक हुने गंगा आरतीमा सहभागी गराउने तयारी छ ।
नयाँदिल्लीको सफदरजंग रेल्वे स्टेशनबाट प्रस्थान गरेको रेल भारतको अयोध्या, नन्दीग्राम हुँदै आज जनकपुर आउन लागेको हो । जनकपुरधामबाट सीतामढी, बनारस, प्रयागराज, चित्रकुट, पञ्चवटी, नसिका, हम्पी, रामेश्वरम, काँचिपुरम, भद्राचलम हुँदै उक्त रेल पुनः दिल्ली फर्किने छ ।
सो रेलको सबै १४ डिब्बामा भारतीय लोककला, सँस्कृति, परम्परा, सम्पदाल झल्काउने तस्वीर राखिएको छ ।
