काठमाडौं । आर्थिक प्रलोभन देखाएर मिर्गौला बिक्री गर्न भारत लैजान लागिएको अवस्थामा काठमाडौंबाट दुईजनाको उद्धार गरिएको छ ।
काठमाडौंको माछा पोखरीस्थित एक होटलबाट दुईजनाको उद्धार गरिएको हो ।
आर्थिक अवस्था कमजोर भएका उनीहरूलाई आर्थिक प्रलोभन देखाएर एउटा मिर्गौला बिक्री गर्दा ८ लाख रूपैयाँ पाइने भन्दै गिरोहले भारत लैजान उक्त होटलमा राखेको प्रहरीको दाबी छ ।
उनीहरुलाई भारत लैजान लागेको आरोपमा प्रहरीले मकवानपुरको हेटौँडा–१९ स्थायी घर भइ काठमाडौं –४ बसोबास गर्दै आएका ३९ वर्षीय मोती लामालाई पक्राउ गरेको छ ।
प्रहरीका अनुसार मानव बेचबिखन तथा ओसारप्रसार मुद्दामा लामालाई अदालतबाट ७ दिनको म्याद लिएर अनुसन्धान थालिएको छ ।
