काठमाडौँ । अजय देवगन अभिनित फिल्म ‘दृश्यम’ कोरियन भाषामा रिमेक हुने पहिलो भारतीय फिल्म बनेको छ।
‘कान्स फिल्म फेस्टिभल’मा यो घोषणा गरिएको थियो। फिल्मका लागि पानोरमा स्टुडियो र एन्थोलोजी स्टुडियोले साझेदारी गरेका छन्। कोरियन भाषामा भारतीय फिल्म रिमेक हुन लागेको यो पहिलो पटक हो।
‘दृश्यम’ पहिलो पटक २०१३ मा मलयालम भाषामा बनेको थियो, जसमा मोहनलाल मुख्य भूमिकामा थिए । यो फिल्म हालसम्म ७ भाषामा बनेको छ, जसमध्ये तीन विदेशी भाषा पनि समावेश छन्। अब यो आठौं पटक कोरियन भाषामा बन्न लागेको हो।
यस फिल्ममा ‘प्यारासाइट’ अभिनेता गीत काङ होले अभिनय गर्नेछन् भने निर्देशक किम जी वुन हुनेछन्। ‘दृश्यम’ सन् २०१५ मा हिन्दीमा रिलिज भएको थियो। यसमा अजय देवगन, तब्बु, श्रिया शरण, इशिता दत्ता र ऋषभ चड्ढाको महत्वपूर्ण भूमिका थियो।
३८ करोडमा बनेको फिल्मले विश्वभर १ सय ११ करोड कलेक्सन गरेको थियो। यसको दोस्रो भाग सन् २०२२ मा रिलिज भएको थियो।
