इटहरी । इटहरी ६ स्थित आइतबारेमा आज बिहान आगलागी हुँदा पाँच वटा पसलमा क्षति भएको छ ।
बिहान करिब ४ः४५ बजेतिर सेवारो फ्रेस हाउसमा विद्युत् सर्ट भएर सुरु भएको आगोले आसपासका पसलहरूमा तीव्र रूपमा फैलिँदै पाँच वटा पसलमा क्षति पुर्याएको हो।
इलाका प्रहरी कार्यालय इटहरीका डीएसपी सुवास हमालका अनुसार आगलागीका क्रममा फ्रेस हाउसमा रहेका तीन वटा ग्यास सिलिन्डर पड्किएपछि आगो नियन्त्रण बाहिर गएको थियो।
आगो फैलिँदा सेवारो फ्रेस हाउस र खड्का फ्रेस हाउस पूर्णरूपमा जलेर नष्ट भएका छन्।
सेवारो फ्रेस हाउसमा करिब दुई लाख र खड्का फ्रेस हाउसमा करिब तीन लाख रुपैयाँ बराबरको क्षति भएको प्रारम्भिक अनुमान छ।
खड्का फ्रेस हाउसका दुई वटा सटर र सटरभित्र राखिएको एक थान मोटरसाइकल समेत जलेर नष्ट भएको प्रहरीले जनाएको छ।
यसैगरी नमस्ते फ्रेस हाउस, पूर्वाञ्चल फ्रेस हाउस र गणेश सब्जी पसलमा आंशिक क्षति पुगेको छ।
नमस्ते फ्रेस हाउसमा करिब एक लाख १० हजार, गणेश सब्जी पसलमा करिब ८० हजार र पूर्वाञ्चल फ्रेस हाउसमा करिब पाँच हजार रुपैयाँ बराबरको क्षति भएको प्रहरीले जनाएको छ।
ती पसलका सामानहरू प्रहरी र नेपाली सेनाले समयमै बाहिर निकालेकाले ठूलो क्षति हुनबाट जोगिएको डीएसपी हमालले जानकारी दिए।
इटहरी उपमहानगरपालिकाको दमकल जेनजी आन्दोलनका क्रममा जलेर प्रयोगमा नरहेकाले धरान, झुम्का र दुहबीबाट आएका दमकलको सहायतामा आगो नियन्त्रणमा लिइएको थियो।
घटनाबारे विस्तृत अनुसन्धान भइरहेको प्रहरीले जनाएको छ।
