२०७८ साल माघ ६ गते बिहिबार

गोधुली क्लबलाई हराउँदै धरान फुटबल क्लबले जित्यो ए डिभिजन लिगको उपाधी

न्युजलय २५ पुस २०७८, अाईतबार ०७:४१ मा प्रकाशित
सुनसरी । सुनसरी जिल्ला स्तरिय ए डिभिजन लिग फुटबलको उपाधी धरान फुटबल क्लबले जितेको छ । इटहरी रंगशालामा आज आइतबार सम्पन्न फाइनल खेलमा धरानकै गोधुली क्लबलार्ई सडेन डेथमा पराजित गर्दै धरानले उपाधी जितेको हो ।

उपाधीसंगै प्रदेश लिगको लागि समेत छनौट भएको धरान फुटबल क्लबले नगद ५० हजार रुपैयाँ हात पारेको छ भने उपबिजेता गोधुली क्लबले नगद २५ हजार रुपैयाँमा चित्त बुझाएको छ । 

इटहरी रंगशालामा आज आइतबार भएको फाइनलमा निर्धारित ९० मिनेट र त्यसपछिको १५ मिनेट थपिएको अतिरिक्त समयमा समेत दुबै टिमबाट गोल हुन नसकेपछी खेल पेनाल्टी सुटआउटमा धकेलिएको थियो । पेनाल्टी सुटआउट समेत दुबै टिमले ५–५ गोलको बराबरी खेलेपछि खेलको निर्णय सडेन डेथबाट लिइएको हो ।

सडेन डेथमा गोधुलीका नीमा शेर्पाको प्रहार बाहिरिनुनै उसका लागि दुर्भाग्य बन्दा धरान फुटबल क्लबका सुबेश राईले गोल गर्न सफल भएपछी धरानको भाग्य चम्किएको हो ।  

फाइनल खेलको म्यान अफ द म्याच गोधुली क्लबका सबिन राई घोषित भए । बिधागत पुरस्कारतर्फ धरान फुटबल क्लबकै बर्चश्व रह्यो । धरान फुटबलका क्याप्टेन रिवश मास्के उत्कृष्ट खेलाडी घोषित हुँदै नगद ५ हजार पुरस्कार पाए । धरानकै राजीव खड्का उत्कृष्ट गोलकिपर र सागर घिमिरे उत्कृष्ट प्रशिक्षक घोषित भए ।

गोधुली फुटबल क्लबका सुशिल राई उत्कृष्ट मिडफिल्डर, राष्ट्रिय जागृती क्लब इटहरीका अनिष चौधरी उत्कृष्ट डिफेन्स, न्यू स्टार क्लब बराहक्षेत्रका सन्दिप श्रेष्ठ उत्कृष्ट स्टाईकर घोषित भए । उनीहरु सबैले जनही ३ हजार ५ सय नगद पुरस्कार पाए । सुनसरी जिल्ला फुटबल संघका आयोजनामा सम्पन्न लिगमा सुनसरीका आठ टिमले प्रतिष्पर्धा गरेका थिए ।