इटहरी । गायक नगेन्द्र कटुवालको राष्ट्रभक्ति गीत ‘देश बचाउन युवा उठ’ बोलको गीतको विमोचन गरिएको छ । सुनसरीको इटहरीमा आयोजित एक औपचारिक कार्यक्रमका बीच प्रमुख अतिथि कोशी प्रदेशका पूर्वमुख्यमन्त्री शेरधन राईले गितको विमोचन गरेका हुन् ।
विमोचन कार्यक्रममा बोल्दै पूर्वमुख्यमन्त्री राईले गीतले देशप्रति संवेदनशील हुने सन्देश बोकेको बताउँदै यस्ता गीतहरु अझै बन्नुपर्ने प्रतिक्रिया दिए । गीतकै माध्यमबाट देशका युवामा देशभक्ति भावना बढ्ने कोशी प्रदेशको पूर्व उपसभामुख सरश्वति पोखरेलले बताइन् ।
काव्यकला क्रिएशनको प्रस्तुति रहेको गित नरेश खड्काको शब्द तथा बलराम समालको संगीतमा तयार पारिएको छ । देश छाडेर जाने युवाहरुको कारण समस्यामा रहेको समयमा यो गीतले देश भक्तिमा केही टेवा पुगोस भनि निर्माण गरिएको गायक नगेन्द्र कटुवालले बताए । राष्ट्रभावनाबाट ओतप्रोत गीतमा युवाहरु देश प्रति जिम्मेवार रहनुपर्ने कुरा गीतमा दर्शाइएको छ ।
म्युजिक भिडियो काव्यकला क्रिएशनका रोहित खनालले निर्देशन तथा सम्पादन गरेका हुन् भने गीतको छायाङ्कन केशव खनालले गरेका हुन् ।
