मानब बेचबिखन मुद्दामा प्रदेशसभा सदस्यलाई बिगो भराउने फैसला

Newslaya Home

मानब बेचबिखन मुद्दामा प्रदेशसभा सदस्यलाई बिगो भराउने फैसला

शुक्रबार ०२, माघ २०७७

काठमाण्डौ । मानब बेच बिखन मुद्दामा लुम्बिनी प्रदेशसभा सदस्य बिमला ओलीलाई अदालतले बिगो भराउने फैसला सुनाएको छ ।

पिडित नरेन्द्र बस्नेतले मानब बेचबिखन ब्युरो काठमाडौं मार्फत काठमाडौं जिल्ला अदालतमा मुद्धा दिएका थिए । उक्त मुद्दामा फैसला सुनाउँदै अदालतले अभियुक्तलाई दोषी ठहर गर्दै सजाय तोकेको हो ।

नरेन्द्रलाई अमेरिका पठाउने मुख्य व्यक्ति तत्कालीन लुम्बिनि प्रदेशका प्रदेशसभा सदस्य उत्तरकुमार ओलीको मृत्यु भइसकेको छ। उनको मृत्यु भइसकेकाले उत्तरकी श्रीमती लुम्बिनी प्रदेशसभाकी प्रदेशसभा सदस्य विमला ओलीले २५ लाख रुपैयाँ बिगो तिर्नुपर्ने फैसला अदालतले गरेको हो।

अर्का अभियुक्त घोराही–१४ का टोपबहादुर जिसीलाई २ वर्ष कैद र १२ लाख रुपैयाँ बिगो भराउने र मतियारको भूमिकामा देखिएका तुलसिपुरका मुकुन्दराज जीसीलाई एक वर्ष कैदको फैसला गरेको छ।

उनीहरु तीन जनाकै संलग्नतामा नरेन्द्रलाई अमेरिका पठाउने योजना बुनिएको थियो । दाङका नरेन्द्र बस्नेतले अमेरिका पुगेर पैसा कमाउने र ग्रिनकार्ड पनि लिने आशामा दलाललाई पैसा खुवाए। तर, अमेरिका टेकेकै दिन उनी जेल परे।

१७ महिना जेल बसेर नरेन्द्र नेपाल फर्किए र आफूलाई फसाउनेहरुमाथि मुद्दा दायर गरे। अमेरिकाको जेलबाट छुटेर आउँदासम्म नरेन्द्रले ७५ लाख ९७ हजार रुपैयाँ खर्च भएको उनले बताएका छन्।