‘परिवारको प्रेरणाले शैक्षिकसँगै सामाजिक संस्थामा सक्रिय छु’

Newslaya Home

‘परिवारको प्रेरणाले शैक्षिकसँगै सामाजिक संस्थामा सक्रिय छु’

बिहीबार १८, भदौ २०७७

सफल पौडेल इटहरीस्थित सनसाइन स्कुल अफ टुरिजम एण्ड होटल म्यानेजमेण्टका सञ्चालक हुन् । सानैदेखि घुम्ने, नयाँ मानिसहरुसँग कुराकानी गर्ने अनि शिक्षा क्षेत्रमा सक्रिय हुने इच्छा बमोजिम उनले यो स्कुल सञ्चालनमा ल्याएका हुन् । व्यवशायका साथै जेसिज तथा लियो क्लबमार्फत् सामाजिक काममा पनि सक्रिय पौडेलसँग न्युजलयका लागि ज्योति पोख्रेलले गरेको कुराकानी :

आजभोली के मा व्यस्त हुनुहुन्छ ?
अहिले लकडाउनको स्थिती छ । यस्तो बेलामा म खानेकुरा प्रति अलि बढि रुचि भएकोे मान्छे भएकोले अहिले नयाँ कुराहरु सिक्दै, घरमै अभ्यास गर्दै बस्दै छु । यसको साथसाथै सामाजिक संघसस्थामा पनि आबद्ध भएर समाजको लागि विशेष समय दिइरहेको छु । डेढ वर्ष भयो कलेज सञ्चालन गरेको छु, त्यसको व्यवस्थापनमा पनि सक्रिय छु ।

युवा हुनुहुन्छ, कोबाट प्रेरित भएर कलेज सञ्चालनमा लाग्नु भयो ?
जेसिसमा पनि आबद्ध भएको हुनाले सानैदेखि धेरै उद्यमशिलताहरुको तालिमहरु लिने, प्रेरणादायी भाषण सुन्ने गर्थेँ । त्यस्तै अरु सफल व्यक्तित्वहरुको जीवनबाट प्रेरित भएर सानै उमेरदेखि आफ्नै देशमा केहि गर्नुृपर्छ भन्ने लाग्थ्यो । त्यहि सोँचले नै म नेपाल फर्केर आएको हो विदेशबाट । अनि मेरो चाहिँ परिवार नै शैक्षिक संस्थामा आबद्ध भएको हुनाले त्यहिबाट प्रेरणा भयो ।

कलेज सञ्चालन गर्न सुरुवातका दिनहरुमा के कस्ता समस्याहरु आए ?
जुनसुकै काममा हात हाल्दा कमजोरी र सबल पक्ष मज्जाले बुझ्नुपर्ने हुन्छ । म होटल म्यानेजमेन्टको विद्यार्थी भएको हुनाले मलाई गणित, बिज्ञान जस्ता विषय मनै नपर्ने । त्यसैले फाइनान्स, म्यानेजमेन्ट गर्ने कुरामा एकदमै समस्या आएको थियो । तर बिस्तारै मेरो पार्टनरहरुको सहयोगले गर्दा बुझ्दै गएँ ।

होटल म्यानेजमेन्ट क्षेत्र नै किन रोज्नुभयो ?
मलाई सानै देखि होटल स्थापना गर्ने सपना थियो । त्यहि अनुसार मैले ब्याचलर लेबलमा होटल म्यानेजमेन्ट पढेँ । नयाँ मान्छेहरुसँग बोल्ने, आफ्नो केहि कुराहरु ब्यक्त गर्ने, नयाँ कुरा सिक्ने अनि विभिन्न देशहरु घुम्ने काम मनपर्ने हुँदा मैले यो क्षेत्र रोजेको हुँ ।

अहिले कोरोनाको महामारी छ । यस्तोमा कलेजलाई कसरी व्यवस्थापन गर्दै हुनुहुन्छ ?
पर्यटन र शिक्षासँग सम्बन्धित भएकोले अहिले कलेजलाई असर गरेको छ । होटल म्यानेजमेन्ट पढाएपछि नेपालमा मात्रै नभएर बाहिर विदेशसमेत पठाउनुपर्ने हुन्छ । अन्तर्राष्ट्रिय उडान बन्द भएको अबस्थामा र होटेलहरु नचलेको अवस्थामा एकदमै गाह्रो भैरहेको छ । लकडाउन पछि यो क्षेत्र झन् ब्यापक रुपमा फैलनेछ भन्ने आशा भने छ । स्थिती राम्रो हुने प्रतिक्षामा छौं ।

तपाईको कलेजका विशेषताहरु के छन् ? विद्यार्थीले तपाईकै कलेज किन रोज्ने ?
हामीसँग होटल म्यानेजमेन्टको एउटा टिम छ । शिक्षकहरु काम र पढाई दुई वटा मै अनुभवी हुनुन्छ । कलेजमा पुर्वाधार स्तरीय छ । सैद्धान्तिकभन्दा व्यवहारीक सिकाईमा बढि ध्यान दिन्छौँ । यस पटकको शैक्षिक सत्रमा ७० प्रतिशत प्राक्टिकल र ३० प्रतिशत थ्योरी पढाउने योजना छ । ४ दिन कलेजमा पढाउने र बाँकी २ दिन विभिन्न होटलहरुमा इन्टर्न गराउने योजना छ ।

अहिलेसम्म कति विद्यार्थी उत्पादन भए ?
हाम्रोमा डिप्लोमेटिक होटेल म्यानेजमेन्ट पढाई हुने हो । पहिलो ब्याच ६ महिनाको हुन्छ । त्यसमा लगभग २५ जना उत्तीर्ण भएर ईन्टर्नसिप जानेबेलामा कोरोनाले गर्दा अहिले रोकिनुभएको छ । दोस्रो ब्याचमा १२ जना विद्यार्थी भर्नाभएर पढीरहनुभएको छ । हामीसँग अरु सर्ट टर्म कोर्षहरु जस्तै वरिष्ता, कफि मेकिङ, बार टेन्डिङ पनि सिकाइन्छ । यस्ता सर्ट टर्म तालिम लिएर इटहरी, धरान, भेडेटार, विराटनगरलगायत विभिन्न क्षेत्रमा काम गरीराख्नु भएको छ ।

सामाजिक काममा पनि सक्रिय हुनुहुन्छ ?
बुवा, आमा सबै सामाजिक संघसंस्थामा सक्रिय भएकोले पनि मलाई सामाजिक काममा सक्रिय हुने प्रेरणा मिलेको हो । म अहिले इटहरी जेसिसको उपाध्यक्ष र लियो क्लब अफ इटहरी सिटिको अध्यक्षको रुपमा सक्रिय छु । क्लबबाट यो वर्ष २००० वटा बिरुवा रोप्ने योजना छ । साथै कोरोनाको कारणले युवाहरुमा डिप्रेसन बढिरहेकोले यो वर्ष योग, ध्यान का कार्यक्रम ल्याउने, मायाघर इटहरीमा मेहेन्दि लगाउने कार्यक्रम गरिसकेका छौं ।

अन्त्यमा सम्पुर्णलाई के भन्न चाहनुहुन्छ ?
अहिले शैक्षिक संस्था बन्द छ । यस्तोमा नेपाल सरकारले घरभाडा छुट गरीदिए हामीलाई प्रेरणा मिल्ने थियो । साथै म मेरो विद्यार्थीहरुलाई के भन्न चाहन्छु भने यो कोरोना बिस्तारै सकिनेछ । त्यसपछि तपाईहरुले राम्रो ठाउँमा काम पाउनुहुनेछ । त्यसैले हतोत्साही नभइ अध्ययन र सिकाइलाई जारी राख्न अनुरोध छ ।