देशभरका सबै अस्पतालले कोरोना उपचारका लागि २० प्रतिशत बेड छुट्याउनुपर्ने

Newslaya Home

देशभरका सबै अस्पतालले कोरोना उपचारका लागि २० प्रतिशत बेड छुट्याउनुपर्ने

मङ्गलबार २७, साउन २०७७

काठमाडौंँ । सरकारले सम्पूर्ण अस्पतालको २० प्रतिशत बेड कोरोना भाइरस उपचारका लागि छुट्याउनुपर्ने व्यवस्था गरेको छ ।

स्वास्थ्य तथा जनसङ्ख्या मन्त्रालयले निजी, सामुदायिक, सरकारी तथा गैरसरकारी अस्पताललाई २० प्रतिशत बेड कोरोना उपचारका लागि छुट्याउने व्यवस्था गरेको हो ।

मन्त्रालयका प्रवक्ता प्राडा जागेश्वर गौतमले २० प्रतिशत बेड छुट्याएर हब अस्पतालमार्फत स्वास्थ्य मन्त्रालयमा जानकारी गराउन निर्देशन दिएको जनाए ।

कोरोना उपचारका लागि तोकिएका अस्पताल हब हुन् भने अन्य अस्पताल स्याटेलाइट हुन् । उपत्यका लगायत देशभर पुनः कोरोना सङ्क्रमितको सङ्ख्या बढेपछि सबै अस्पतालले २० प्रतिशत बेड छुट्याउन निर्देशन दिएको हो ।

स्वास्थ्य मन्त्रालयले हब र स्याटेलाइट अस्पतालका बिरामीलाई हब अस्पतालले व्यवस्थापन गर्नुपर्ने जनाएको छ ।