उदयपुरमा प्रदर्शनकारी र प्रहरीबीच झडप, १० जना भन्दा धेरै घाइते

Newslaya Home

उदयपुरमा प्रदर्शनकारी र प्रहरीबीच झडप, १० जना भन्दा धेरै घाइते

आइतबार १८, साउन २०७७

उदयपुर । उदयपुरको बेलका नगरपालिकामा प्रदर्शनकारी र प्रहरीबीच झडप भएको छ ।

नगरपालिकामा भ्रष्टाचार भएको भनी छानबिन गरी दोषीमाथि कारबाहीको माग गर्दै आइतबार नगरपालिकाको कार्यालय रहेको रामपुरमा नेपाली कांग्रेस, जनता समाजवादी र राप्रपा कार्यकर्ताले प्रदर्शन गरेका हुन् ।

प्रदर्शनकारीलाई नगरपालिकातर्फ जान रोक्ने क्रममा प्रहरीसँग झडप भएको हो । उक्त झडपमा परी इलाका प्रहरी कार्यालय रामपुरका प्रहरी निरीक्षक रामचन्द्र साह अनुसार प्रहरी जवान राजकुमार बुढाथोकी घाइते भएका हुन् भने प्रदर्शनकारी समेत १० जना भन्दा धेरै घाइते भएको जनाइएको छ ।

घाइतेहरुको इलाका स्वास्थ्य चौकी रामपुरमा उपचार भइरहेको छ ।

केही दिनअघि नगरपालिकाकी उपमेयर राजुकमारी चौधरीले नगरप्रमुख दुर्गाकुमार थापाकै मिलेमतोमा भ्रष्टाचार भएको भन्दै राजीनामा घोषणा गरेकी थिइन् ।

पछि नेकपाका बैठकले राजीनामा फिर्ता लिन निर्देशन दिएपछि उपमेयरले आफूबाट गल्ती भएको भन्दै आत्मालोचना गरेकी थिइन् । तर नेपाली कांग्रेस, जनता समाजवादी पार्टी, राप्रपालगायतले भ्रष्टाचार छानबिनको माग राख्दै आन्दोलन गर्दै आएका छन् ।

विपक्षी दल सडकमा आएपछि नेकपाले पनि मेयरको पक्षमा कार्यकर्ता सडकमा उतारेको छ । दुबै पक्ष प्रदर्शनमा उत्रिएकाले झडप हुने सम्भावना रहेको भन्दै जिल्ला सदरमुकाम गाईघाटबाट ठूलो संख्यामा प्रहरी रामपुर आएका छन् ।