कोरोनाको महामारीको बेला चीनमा देखियो नयाँ भाइरस, एक जनाको मृत्यु

Newslaya Home

कोरोनाको महामारीको बेला चीनमा देखियो नयाँ भाइरस, एक जनाको मृत्यु

मङ्गलबार ११, चैत २०७६

काठमाडौं । विश्वभर कोरोना भाइरस (कोभिड १९) को माहामारी फैलिरहेको बेला चीनमा अर्को नयाँ भाइरस देखिएको छ ।

ग्लोबल टाइम्सका अनुसार युनान प्रान्तमा देखा परेको यो नयाँ भाइरसका कारण २३ मार्चमा एक जनाको ज्यान गएको छ ।

मृतक ३२ वर्षका थिए र परीक्षणका क्रममा हान्टा भाइरस संक्रमणको पुष्टि भएको थियो । कामका लागि सानडोङ प्रान्त पुगेका उनी चार्टर वसबाट सोमबार मात्र फर्किएका थिए ।

बसमा सवार अन्य ३२ जनाको पनि परीक्षण गरिएको छ ।

सीडीसीको रिपोर्टअनुसार यो भाइरस मुसाबाट फैलिन्छ । यदि कुनै व्यक्तिले मुसाको मलमूत्र वा र्याल छोएपछि अनुहारमा हात लगियो भने संक्रमित हुने खतरा रहन्छ । तर हान्टा भाइरस एक व्यक्तिबाट अर्कोमा सर्दैन । साथै संक्रमण भए नभएको पत्ता लगाउन एकदेखि आठ सातासम्म समय लाग्न सक्छ ।

यदि कोही व्यक्ति संक्रमित भयो भने ज्वरो, रुघा, वान्ता हुने जस्ता लक्षण देखिनेछ । र, संक्रमित व्यक्तिको स्वास्थ्य बिग्रिएमा फोक्सोमा पानी जम्मा हुने, श्वास प्रश्वासमा कठिनाइ आउने हुन्छ ।

जनवरी २०१९ मा हान्टा भाइरसका कारण पाटागोनियामा नौ जनाको मृत्यु भएको थियो । त्यसबेला ६० जनामा संक्रमण भएको र उनीहरु मध्ये ५० जनालाई क्वारेन्टाइनमा राखिएको थियो ।