आइतबार रातिदेखि कञ्चनपुर जिल्ला ‘लकडाउन’

Newslaya Home

आइतबार रातिदेखि कञ्चनपुर जिल्ला ‘लकडाउन’

आइतबार ०९, चैत २०७६

महेन्द्रनगर । कञ्चनपुर सदरमुकाम महेन्द्रनगरसहित जिल्लाका बजार र बस्ती क्षेत्रका बासिन्दालाई घर बाहिर निस्कन नदिइने भएको छ ।

जिल्ला प्रशासन कार्यालय कञ्चनपुरले कोरोना भाइरस संक्रमणको जोखिमलाई मध्यनजर गर्दै आइतबार राति ११ः५९ बजेपछि स्थानीयलाई बाहिर निस्किन नदिइने निर्णय गरेको हो ।

कञ्चनपुरका प्रमुख जिल्ला अधिकारी नुरहरि खतिवडाले अर्को निर्णय नहुँदासम्मका लागि आइतबार मध्यरातिदेखि स्थानीयलाई बाहिर निस्किन नदिइने निर्णय भएको जानकारी दिए ।

‘सम्पूर्ण उद्योग, कलकारखाना र बजार बन्द हुने छ,’ प्रमुख जिल्ला अधिकारी खतिवडाले भने, ‘कोरोना भाइरस संक्रमणको जोखिम न्यूनिकरणका लागि यो निर्णय गरिएको हो । यसमा सबै स्थानीयले सहयोग गर्नुहुनेछ ।’

भारतसँगको प्रमुख नाका मानिएको गड्डाचौकी नाकालाई पनि अनिश्चित कालका लागि बन्द गर्ने निर्णय भएको खतिवडाले बताए ।

मंगलबारदेखि गड्डाचौकी नाकाबाट सम्पूर्ण प्रकारको आवतजावतमा रोक लगाइने छ । पछिल्लो समय गड्डाचौकी नाका हुँदै स्वदेश फर्किनेको भीड लाग्न थालेपछि स्थानीय तहले नाका बन्द गर्न भन्दै केन्द्र सरकारको ध्यानाकर्षण गराएका थिए ।