दिल्लीमा सामूहिक बलत्कार गर्नेलाई ७ वर्षपछि फाँसी

Newslaya Home

दिल्लीमा सामूहिक बलत्कार गर्नेलाई ७ वर्षपछि फाँसी

शुक्रबार ०७, चैत २०७६

नयाँ दिल्ली । भारतको राजधानी नयाँ दिल्लीमा सात वर्षअघि भएको सामूहिक बलत्कार काण्डका चारै जना दोषीलाई शुक्रबार बिहान साढे ५ बजे तिहाड जेलमा फांसी दिइएको छ ।

सन् २०१२ मा सार्वजनिक सवारीमा सवार २३ वर्षीया एक युवती (निर्भया) माथि हमला गरी सामूहिक बलात्कार गरेर मृत्युको मुखमा पुर्‍याउने चारै जनालाई दिल्ली अदालतले अन्तिम समय ५ मार्चमा फांसीको मिति तोकेको थियो ।

सोही तालिका बमोजिम चारै जना दोषी पवन गुप्ता, विनय शर्मा, मुकेश सिंह र अक्षय कुमारलाई शुक्रबार तिहाड जेलमा जल्लादले झुण्ड्याएका हुन् ।

दोषीलाई फांसी दिएसँगै पीडित निर्भयाका अभिभावकले छोरीले न्याय पाएको प्रतिक्रिया दिएका छन् ।

घटनामा ६ जनाको संलग्नता रहेको आरोप लागे पनि एक जनाले हिरासतमै आत्महत्या गरेका थिए भने एक जना घटनाको समय नाबालिग नै भनि सुधारगृहमा राखेर रिहा गरिएका थिए ।

बाँकी रहेका चार जनालाई चौथो पटक फांसीको सजाय सुनाएपछि शुक्रबार कार्यन्वयन गरिएको हो ।

फांसी दिइनु अघि दोषी पक्षका वकिलले बिहीबार सजायविरुद्ध पटियाला हाउस कोर्ट र दिल्ली हाई कोर्टमा गरेको याचिका खारेज भएका थिए । दोषीलाई फाँसीबाट जोगाउन मध्यरातमा दिल्ली हाईकोर्ट पुगेका दोषी पक्षका वकिलहरूलाई न्यायाधीशहरू मनमोहन र सञ्जीव नरुलाको इजलासले फिर्ता पठाइ दियो ।

त्यसपछि दोषी पक्षका वकिल अन्तिम समय मध्यरातमै सर्वोच्च अदालत समेत पुगेका थिए । तर सर्वोच्चका न्यायाधीश भानुमतिको अध्यक्षतामा बसेको विशेष इजलासले दलील कमजोर भएको भन्दै याचिका खारेज गरिदियो ।

यसअघि राष्ट्रपति रामनाथ कोविन्द समक्ष सजाय माफीका लागि दया याचिका पेश गरिएको थियो । उनले पनि यसलाई खारेज गरिदिएका थिए । राष्ट्रपति समक्ष याचिका पेस गरेकै कारण यसअघि ३ मार्चका लागि तोकिएको फाँसी २ मार्चमा रोकिएको थियो । त्यसपछि ५ मार्चमा अदालतले चौथो पटक मृत्युदण्ड दिइने मिति तोकेको थियो ।