भारतमा बन्धक बनाइएका दुई नेपाली युवतीको उद्धार

Newslaya Home

भारतमा बन्धक बनाइएका दुई नेपाली युवतीको उद्धार

शुक्रबार ०९, फागुन २०७६

नवलपरासी । भारतमा छ महिनादेखि बन्धक बनाई राखिएका दुई नेपाली युवतीको उद्धार गरिएको छ । पश्चिम नवलपरासीस्थित सीमा प्रहरी चौकी महेशपुरबाट खटिएको टोलीले माइती नेपाल र भारतीय प्रहरीको सहयोगमा भारतको महाराजगञ्ज जिल्लाको कटरी रोड कम्ताबजारबाट उनीहरुलाई उद्धार गरेको हो ।

छोरीलाई बन्धक बनाई राखिएकाले उद्धार गरिदिनु भन्ने युवतीकी आमाको उजुरीका आधारमा उनीहरुलाई उद्धार गरी आफन्तको जिम्मा लगाइएको र घटनाको थप अनुसन्धान पनि चलिरहेको जिल्ला प्रहरी कार्यालय पश्चिम नवलपरासीले जनाएको छ । युवती लैजाने राई थरकी महिला र अन्य संलग्नहरुको खोजी भइरहेको प्रहरीले जनाएको छ ।

उद्धार गरिएका युवती नवलपरासीको बर्दघाटका एकै घरका दिदीबहिनी हुन् । एक महिलाले पसलमा राम्रो काम लगाइदिने भन्दै प्रलोभनमा पारी भारत लगेको तर त्यहाँ कोठामा बन्धक बनाई शारीरिक, मानसिक तथा आर्थिक यातना दिने, नाच्न लगाउने र घरमा आउनसमेत नदिएपछि उनीहरुले घरमा खबर गरेको युवतीकी आमाले बताइन् ।