आजबाट हिउँदे झरी सुरु हुँदै, तराईमा बाक्लो हुस्सु

Newslaya Home

आजबाट हिउँदे झरी सुरु हुँदै, तराईमा बाक्लो हुस्सु

सोमबार २८, पुष २०७६

काठमाडौं । आज (सोमबार) बाट हिउँदै झरी सुरु हुने मौसम विभाग पूर्वानुमान महाशाखाले जनाएको छ ।

भू–मध्य सागरको वायुको प्रभाव सक्रिय हुने भएकाले गत शुक्रबारबाट रोकिएको झरी फेरि सुरु हुने भएको हो ।

पूर्वानुमान महाशाखाका अनुसार भू–मध्य सागरको वायु दक्षिण एसियाली मुलुकतर्फ बहने जलवाष्पयुक्त हावाको मात्रा पर्याप्त भएपछि हिउँदे झरी दोहोरिने भएको छ । यो चौँथो चरणको झरी गराउने वायु हो ।

सोमबार भने दिनभर पहाडी भू–भाग सामान्यतया सफा नै रहने र तराईका भूभागहरुमा भने हुस्सु लाग्ने सम्भावना रहेको छ ।

रातिबाट देशका पश्चिमी भूभागमा आंशिकदेखि सामान्य बदली हुनेछ । पश्चिमी पहाडी भूभागहरुमा हल्का वर्षाको सम्भावना रहेको छ भने उच्च पहाडी र हिमाली क्षेत्रका केही स्थानमा हिमपात हुने सम्भावना छ ।

सोमबार रातिबाट सुरु हुने उक्त वायुको प्रभाव बिहीबार र शुक्रबार फैलने पूर्वानुमान महाशाखाले जनाएको छ ।