अब इन्स्टाग्राममा जन्ममिति खुलाउनु पर्ने

Newslaya Home

अब इन्स्टाग्राममा जन्ममिति खुलाउनु पर्ने

आइतबार २२, मङि्सर २०७६

काठमाडौं । फोटो शेयरिङ एप इन्स्टाग्राम सुरु भएको झण्डै एक दशक भयो । अहिलेसम्म इन्स्टाग्राममा खाता खोल्दा उमेर मात्रै उल्लेख गरे हुन्थ्यो, जन्ममिति भने राख्नु पर्दैन थियो । तर अबचाहिँ इन्स्टाग्राममा नयाँ अकाउन्ट खोल्दा जन्ममिति राख्नुपर्ने नयाँ नियम बन्ने भएको छ ।

खासगरी बालबालिका तथा किशोरकिशोरीहरूलाई सोसल साइटमा हुने हिंसाबाट जोगाउनका लागि इन्स्टाग्रामले यस्तो उपाय अपनाएको हो ।

बुधबारदेखि इन्स्टाग्राममा नयाँ खाता खोल्दा जन्ममिति उल्लेख गर्नुपर्ने प्रावधान राखिएको छ । यसअघि इन्स्टाग्राममा खाता खोल्दा प्रयोगकर्ताले आफ्नो उमेर १३ वर्ष वा सोभन्दा माथि रहेको कुरा उल्लेख गरे पुग्दथ्यो र पूरा जन्ममिति उल्लेख गर्नु पर्दैन थियो ।

इस्टाग्रामले लामो समयदेखि प्रयोगकर्ताको छद्मतालाई मान्यता दिँदै आएको छ र प्रयोगकर्ताले आफ्नो वास्तविक नाम खुलाउन पर्दैन । नाम मात्र होइन उमेरको हकमा समेत प्रयोगकर्ताको मनमौजी चल्ने गरेको थियो । अर्थात् प्रयोगकर्ताले आफ्नो उमेर समेत ढाँट्न सक्दछन् र जुनसुकै उमेरका बालबालिकाले समेत आफ्नो उमेर १३ वर्षभन्दा माथि भनेर इन्स्टाग्राममा खाता खोल्न सक्ने अवस्था थियो ।

इन्स्टामा अकाउन्ट खोल्दा जन्ममिति खुलाउनु पर्ने प्रावधानले कम उमेरका बालबालिका तथा किशोर किशोरीलाई इन्स्टाग्राम प्रयोग गर्न निरुत्साहन गर्ने र त्यसबाट बालबालिकामाथि इन्स्टामा हुने हिंसाको जोखिम कम हुने विश्वास इन्स्टाग्रामको छ ।

कम उमेरका बालबालिकाहरूलाई समेत इन्स्टाग्राम प्रयोगमा रोक्न नसकेको र यसबाट बालबालिकाहरू अनुपयुक्त सामाग्रीहरू हेर्न बाध्य हुने गरेको भन्दै इन्स्टाग्रामको आलोचना हुने गरेको छ ।

इन्स्टाग्राममा खाता खोल्न जन्ममिति उल्लेख गर्नुपर्ने प्रावधान सुरु गरेता पनि प्रयोगकर्ताको जन्मदिन फेसबुकमा जस्तो सार्वजनिक भने नगरिने इन्स्टाग्रामले जनाएको छ ।

नयाँ खाता खोल्दा जन्ममिति उल्लेख गर्नुपर्ने अनिवार्यता भए पनि पुराना प्रयोगकर्ताले भने स्वेच्छिक रूपमा आफ्नो जन्ममिति राख्न पाउनेछन् । फेसबुकसँग आबद्ध भएका इन्स्टाग्राम अकाउन्टको हकमा फेसबुकमै उल्लेखित जन्ममितिलाई नै स्वतः इन्स्टाग्राममा सारिनेछ ।