विद्यार्थी सङ्गठनको विरोध प्रदर्शनका क्रममा झडप,केही नेता घाइते

Newslaya Home

विद्यार्थी सङ्गठनको विरोध प्रदर्शनका क्रममा झडप,केही नेता घाइते

आइतबार २२, साउन २०७४

काठमाडौ । निजी विद्यालयले सरकारले निर्दिष्ट गरेको मापदण्डभन्दा बढी शुल्क लिएको बिरुद्ध कारबाहीको माग गर्दै संयुक्त विद्यार्थी सङ्गठनले जिल्ला शिक्षा कार्यालय अगाडि गरेको विरोध प्रदर्शनका क्रममा शुक्रबार झडप भएको छ ।
विद्यार्थी भर्ना गर्दा मापदण्डभन्दा बढी लिइएको शुल्क सम्बन्धित अभिभावकलाई बोलाएर अविलम्ब फिर्ता गर्नुपर्ने भन्दै गरिएको प्रदर्शनमा झडप हुँदा केही विद्यार्थी नेता घाइते भएका छन् । ललितपुर र भक्तपुरका शिक्षा कार्यालयमा तालाबन्दी समेत गरिएको अनेरास्ववियुका सचिव आरसी लामिछानेले जानकारी दिए । निजी शैक्षिक संस्थाले सरकारको मार्ग निर्देशनको उल्लङ्घन गरी जथाभावी शुल्क निर्धारण गर्नु कानुन विपरीत रहेको भन्दै त्यसविरुद्ध सशक्त आन्दोलनका कार्यक्रम गरिएको उनले बताए ।
सरकारले वार्तामा बोलाएको भए पनि शुल्क फिर्ताको क्रम सुरु नहुँदासम्म वार्ता नबस्ने विद्यार्थी सङ्गठनले जनाएको छ । सङ्गठनको अघिल्लो दिन बसेको बैठकले माग पूरा गर्ने देशभर विरोध प्रदर्शन तथा शुल्क लिने विद्यालय सञ्चालक लगायतलाई बहिष्कार गर्ने निर्णय पनि गरेको थियो । निजी विद्यालय सञ्चालकले शुल्क फिर्ता नगर्दासम्म उनीहरूलाई सामाजिक बहिष्कार गर्ने सङ्गठनले जनाएको छ । संयुक्त विद्यार्थी सङ्गठनमा नेविसङ्घ, अनेरास्ववियु, अनेरास्ववियु क्रान्तिकारी, राप्रविसंलगायत आठ सङ्गठन आवद्ध रहेका छन् ।