के तपाईको कान चिलाइरहन्छ ? यसो गर्नुहोस्

Newslaya Home

के तपाईको कान चिलाइरहन्छ ? यसो गर्नुहोस्

बुधबार ०८, फागुन २०७५

प्रायः कतिपय मानिसको कान चिलाउने समस्या हुन्छ । कहिलेकाहीँ कान चिलाउनु त सामान्य हो । तर, कानको भित्री भाग बारम्बार चिलाइरहन्छ भने त्यसलाई सामान्य मान्नु हुँदैन । हामी प्रायः कान चिलाउँदा कन्याउन हातका औँला प्रयोग गर्छन् । यति मात्रै नभएर कानभित्र सिन्का, सिसाकलम, कनकर्नुजस्ता तीखा वस्तु पनि घुसार्छौँ । 

तर, कानभित्र यस्ता वस्तुको प्रयोग घातक हुन सक्छ । त्यसैले, कानभित्र जे पायो त्यही घुसार्ने बानी नगर्नुहोस् । लगातार कान चिलाउँछ भने तपाईंको कानमा इन्फेक्सन भएको हुन सक्छ । चिलाइ मार्न कानभित्र औँला घुसार्दा उल्टै इन्फेक्सन बढ्ने खतरा हुन्छ । 

सबैभन्दा पहिले कान किन चिलाउँछ, त्यसमा ध्यान दिन जरुरी छ । कान मानव शरीरको निकै संवेदनशील अंग हो । छालामा हुने सुक्खापन र खानपानको गडबडीले पनि कान चिलाउने गर्दछ । यस्तो अवस्थामा यस्ता घरेलु उपचार गर्नुहोस्ः 

एलोभेराः एलोभेरा (घ्यु कुमारी) बहुगुणयुक्त घरेलु औषधि हो । यसको एक–दुई थोपा रस कानको भित्री भागसम्म पुग्ने गरी राख्नाले कान चिलाउने र इन्फेक्सन हुने समस्याबाट बच्न सकिन्छ । एलोभेरामा हुने एन्टी–इन्फेमेन्टरी गुणले कानको समस्या निदान गर्न र छालाको सुक्खापन हटाउन सहयोग गर्छ । 

तेलः अक्सर हामी तोरीको तेल कानमा राख्छौँ । तर, तोरीको सट्टा नरिवल वा एलोभेराको तेल प्रयोग गर्दा कानको समस्या हटाउन मद्दत पुग्छ ।

लशुनः लशुन हाम्रो भान्सामा सजिलै पाइने खाद्यवस्तु हो । यसका सयौँ गुण छन् । लशुनमा एन्टिबायोटिक गुण पनि हुन्छ । जैतुन र तिलको तेलमा एक केस्रा लसुन फुराई कानको बाहिरी भागमा लगाउनाले कानलाई इन्फेक्नबाट बचाउन सकिन्छ ।