Newslaya Home

मुख्यमन्त्री रार्इका सहयोगीले अमेरिकामा पत्रकार कुटे, लाग्यो यस्तो आरोप

शुक्रबार २३, कार्तिक २०७५

विराटनगर । प्रदेश १ का मुख्यमन्त्री शेरधन राईका सहयोगीलाई पत्रकार कुटपिटको आरोप लागेको छ । अमेरिका भ्रमणलाई लिएर समाचार लेख्दा अमेरिकाका पत्रकार लोकमणि राईमाथि कुटपिट भएको बताइएको छ ।

अमेरिकाको न्यूयोर्कस्थित क्वीन्सको उडसाइडमा राईका निकट सहयोगी पारुहाङ राईका सोल्टी नाता पर्ने उमेश राईले कुटपिट गरेको बताइएको छ ।

‘एउटा कार्यक्रममा पुगेका राईलाई मुख्यमन्त्रीको त्यस्तो समाचार किन लेखेको भन्दै कुटपिट गरिएको बताइएको छ । राईका अनुसार उनलाई तत्कालै एम्बुलेन्समा हालेर अस्पताल लगिएको थियो । उनले कुटपिट भएको बारेमा फेसबुकबाट नै सार्वजनिक गरेका थिए ।

पत्रकार राईले एक अनलाइनमा मुख्यमन्त्री राईलाई न्यूयोर्कमा विवादास्पद पृष्ठभूमिका केही व्यक्ति र संस्थाले स्वागत र सम्मान गरेको उल्लेख गर्दै समाचार लेखेका थिए ।

नेपालमा विवादास्पद छवि बनाएका हेवेन्ली पाथका अगुवाले स्वागत गरेको तर नेकपानिकट कुनै कार्यकर्ता स्वागतका लागि नगएको लेखेका थिए ।

पत्रकार राईले यसअघि प्रधानमन्त्री केपी शर्मा ओली न्यूर्योक पुग्दा कालो झण्डा देखाउनेहरुबाटै स्वागत र सम्मान थापेकोसमेत लेखेका थिए । 

पत्रकार राईले मंगलबार लेखेको समाचार:

उपचारका लागि थाइल्याण्डको बैंकक हिँडेका प्रदेश नम्बर १ का मुख्यमन्त्री शेरधन राई मङ्गलवार साँझ अमेरिका आइपुगेका छन् ।

उनलाई न्यु जर्सीस्थत नेवार्क इन्टरनेशनल एअरपोर्टमा निमित्त महावाणिज्यदूत पुष्पराज भट्टराई, सङ्घीय समाजवादी फोरम न्यु योर्कका उपाध्यक्ष, जनमुक्ति पार्टीका अमेरिका अध्यक्ष अग्नि राई, तत्कालीन डिमक्रटिक फोरम (प्रवासी मञ्च) को–अर्डिनेटर टेक गुरुङलगायतले स्वागत गरेका छन् । स्वागतमा एमाले सम्बद्ध प्रवासी मञ्चका वर्तमान पदाधिकारी र कार्यकर्ताको उपस्थिति भने लगभग शून्य थियो ।

मुख्यमन्त्री राईको स्वागतमा एमाले सम्बद्ध प्रवासी मञ्चका वर्तमान पदाधिकारी र कार्यकर्ताको उपस्थिति भने लगभग शून्य थियो । निमित्त वाणिज्य दूत भट्टराईले प्रदेश एकका मुख्यमन्त्री राईलाई स्वागत गरेको बताए । ‘मुख्य मन्त्रीज्यू आउने भन्ने जानकारी पाएपछि स्वागत गर्न गएँ,’ उनले भने ।

परराष्ट्र मन्त्रालय स्रोतका अनुसार मुख्यमन्त्री राई उपचारका लागि थाइल्याण्डको ब्यांकक पुग्ने निर्णय मात्र भएको छ । ‘निजी भ्रमण भए पनि मुख्यमन्त्रीजस्तो मान्छे क्याबिनेटको निर्णय बिना अन्य देश जान मिल्दैन,’ परराष्ट्रका ती अधिकारीले भने, ‘यसरी बिना निर्णय अर्को देश भ्रमण गर्नु कूटनीतिक आचारसंहिता विपरीत छ ।’ 

स्रोतका अनुसार मुख्यमन्त्री राई अमेरिका आउने निर्णय प्रदेश एकको क्याबिनेटले पनि गरेको छैन । नेपाल कम्युनिस्ट पार्टीलाई पनि मुख्यमन्त्री राई अमेरिका आउने औपचारिक जानकारी छैन । ‘अध्यक्षलाई भनेर हिँड्नु भएको होला,’ एमालेका एक उच्च अधिकारीले भने, ‘पार्टीलाई औपचारिक जानकारी गराइएको छैन ।’

पार्टीको निर्णय र सरकारको स्वीकृति बेगर अमेरिका पुगेकाले उनलाई प्रवासी मञ्चका कार्यकर्ताको जत्था विमानस्थलमा स्वागत गर्न नपुगेको अनुमान गरिएको छ । उनलाई स्वागत गर्न पुगेका सङ्घीय समाजवादी फोरमका उपाध्यक्ष हेवेन्ली पाथका प्रवर्तक पनि हुन् । 

उपाध्यक्ष राष्ट्रसंघीय महासभामा भाग लिन आएका नेपालका प्रधानमन्त्री केपी ओलीलाई कालो झन्डा देखाउने कार्यक्रम आयोजकमध्ये एक हुन् । मुख्यमन्त्री राईको स्वागतमा हेवेन्ली पाथ न्यु योर्कका अध्यक्ष सुकु राई (पम्फा) पनि पुगेकी थिइन् । 

स्रोतका अनुसार मुख्यमन्त्री राई न्युयोर्कको कार्यक्रम सकेर वासिङ्टन डिसीस्थित क्यानडेली दूतावास पुग्ने योजनामा छन् । त्यसपछि उनी नायग्रा फल्स हुँदै क्यानडा जाने कार्यक्रम छ ।

तस्वीरमा : पत्रकार राई
(अन्नपूर्णपोष्टको सहयोगमा)