सरकारको नजरमा पूर्वका १४ जिल्लामा १४ वटा मात्र पर्यटकीयस्थल, पाँच जिल्लामा पर्यटकीय स्थल छैनन्

Newslaya Home

सरकारको नजरमा पूर्वका १४ जिल्लामा १४ वटा मात्र पर्यटकीयस्थल, पाँच जिल्लामा पर्यटकीय स्थल छैनन्

बिहीबार १५, कार्तिक २०७५

इटहरी । सरकारले नेपालको १ सय नयाँ गन्तव्यहरुको सुची सार्वजनिक गरेको छ । जसमा पुर्वका १४ जिल्लाबाट १४ वटा गन्तव्य सुचीमा अटाएका छन् । 

सरकारले स्थापित भइसकेको पर्यटकीय गन्तव्यहरुलाई प्रर्वद्धन गर्नुपर्ने सुची र नयाँ तथा विकास गर्नुपर्ने गन्तव्यहरुको सुची गरेर दुई किसिमले सार्वजनिक गरेको छ ।

संस्कृति, पर्यटन तथा नागरिक उड्डयन मन्त्रालयले बिहिबार सार्वजनिक गरेको गन्तव्यहरुको सुचीमा १ नं प्रदेशका पाँच वटा जिल्लामा पर्यटकीय गन्तव्य उल्लेख छैन । मोरंग, भोजपुर, पाँचथर, उदयपुर र तेह्रथुममा पर्यटकीय गन्तव्य नरहेको उल्लेख छ । तर ती ठाउँमा विकास गरिनुपर्ने गन्तव्यहरु भने रहेको उल्लेख गरिएको छ ।

सरकारले बनाएको सुचीमा सुनसरीका चार वटा पर्यटकीय स्थलमात्र अटाएका छन् । सुनसरीका बराहक्षेत्र, धरान, इटहरीको तालतलैया र कोशी टप्पु वन्यजन्तु आरक्ष मात्र पर्यटकीय स्थल उल्लेख छन् । सुनसरीमा विकास गरिनुपर्ने पर्यटकीय क्षेत्रहरुको सुची लामो भएपनि नसमेटिएको स्थानिय पर्यटन व्यवशायीहरुले गुनासो गरेका छन् ।

यता मोरंगमा त झन् कुनै पर्यटकीय स्थल नै छैन । सम्भावना बोकेको क्षेत्रको रुपमा बेलबारीको धनपालगढी उल्लेख छ । त्यहाँको विराट राजाको दरबारलगायतका क्षेत्र वेवास्ता गरिएको छ । 

यता झापामा बाँसबारी सिमसार क्षेत्रलाई मात्र पर्यटकीय क्षेत्र उल्लेख गरिएको छ । तर झापामा नयाँ सम्भावित गन्तव्यहरु भने निकै धेरै उल्लेख गरिएको छ । त्यहाँ तीन वटा नयाँ सम्भावनाका क्षेत्र उल्लेख गरिएको छ । 

यस्तै अन्य धेरै पर्यटकीय स्थलहरु सरकारको सुचीमा अटाएका छैनन् । धार्मिक, ऐतिहासिक र प्राकृतिक रुपले अत्यन्त महत्वपूर्ण क्षेत्रहरुसमेत छुटेका छन् ।