Newslaya Home

​धरानका मासु पसलमा कडाई

सोमबार २२, असोज २०७५

धरान । नजिकिदै गरेको चाड पर्वलाई मध्यनजर गरि धरान उपमहानगरपालिकाले मासु पसलहरुलाई कडाई गरेको छ । 

स्वस्थ्य मासु बिक्रि वितरणका लागि नियमित रुपमा मासु पसलहरुमा अनुगमनलाई निरन्तरता दिएको छ । हप्तामा दुई पटक सम्म मासु पसलहरुमा अनुगमन गर्दै स्वस्थ्यकर मासु बिक्रि वितरण गर्न कडाई गरेको हो । 

अघिल्लो विहिबार अनुगमनमा निस्किदा वर्षमा एक चोटी अनुगमन गरेर छाडेको आलोचना भएपछि धरान उपमहानगरपालिका अन्र्तगतको अनुगमन समितीले एक साताभित्रै दोस्रो पटक मासु पसलहरुमा अनुगमन गरेको हो ।

अनुगमनलाई कडाई गरे पनि मासु पसलहरुमा सुधार भने देखिएन् । गत विहिबारको अनुगमनमा देखिएका गल्तीहरु नै पुनः दोहोरयाएका थिए । स्वस्थ्यकर मासु बिक्रि वितरणका लागि बनिएका मापदण्डहरु कडाईका साथ पालना नहुँदा गुणस्तरमा कुनै शुद्धिकरण नभएको उपभोक्ताहरुको गुनासो छ ।

पशु बधशाला तथा मासु जाँच ऐन २०५५ र नियमावली २०५७ ले मासु पसल खोल्न अनिवार्यरुपमा जिल्ला पशुसेवा कार्यालयबाट इजाजत पत्र लिनुपर्ने कानुनी व्यवस्था गरेको छ । तर, धरानका अधिकांश पसलले यो इजाजत पत्र लिएको छैन । थोरै व्यावसायीले मात्र धरान उपमहानगरपालिकामा व्यवसाय दर्ता गरेको पाईएको छ । 

मासु पसलहरुमा मासुलाई अनिवार्यरुपमा सिसाले कभर गरेर राख्नु पर्नेमा खुल्लमखुल्ला बिक्री गरेर उपभोक्ताको स्वास्थ्य माथि गम्भीर खेलवाड गरेको समितीका पदाधिकारीहरु बताउँछन् । सडकको धुलो र फोहोर ड्रेनको दुर्घन्धले मासुमा हानिकारक ब्याक्टेरिया पर्ने र यसले मासुलाई अखाद्य, गुणस्तरहिन बनाउने गर्छ । 

यस्तै, कुनै पनि पसलमा मासुको मुल्य सुची पनि थिएन भने डिप फ्रिजमा राखेर मात्र मासु बिक्री गर्नुपर्नेमा कतिपयले डिप फ्रिज पनि नराखेको भेटिएको छ ।